PAJULAH TA'UN

Jaman mergo dulu idak banyak wang calak, jadi tebilang dusun paling ade sijat due wang yang idak bute huruf.

Make kalu wang yang melek diantare wang bute, make belakulah pepatah lame "dilesor mane dak getek elang, aku lah elang uja belalang"

Kapan wang pacak beurusan jolok wang "pakrul" aman mengkeri cak pengacara la itu. Nye tahan mbeli pekare

Di Pendopo kak ade cerita "kayu are kuncit" pekare Pejuang Syarikat Islam yang bekanti nga Sukarno Hamzah Koentjit dengan Maskapai sampai ari kak idak putus.

Ade pulek wang melawan, kebal tahan di incar anak mate, kuntau pacak.segele e jadi.
Di Abab yang tekojot pesirah Ali abun kene motor ayik todong wang, nye suwang sanggup monoh wang sembilan pancung e nga pedang. Motor ayik tekenal "sembilan darah"

Di Tempirai nyang tekojot jolok wang "tenggiling kering" makai belacu telesan mandi e lagi tubu idak mempan peluru kecepek.

Kelas laen aman pacak mbace doa pacak behujah dikit dikit dem la pacak jadi ketib.
(Minte maap pade anak cucung e) nyang tekenal kak ketib Jasman ade yang ngateke nye ketib tanah lemban. Kene kapan peresiang anci bini wang gerak betanak ndak bejalan mantang nye galak noros bongkot tiang ngadang kalu ade nyang tedangau atau kemek disele daso bulu.

Kene aman dulu jaman belande banyak pulek nyang jadi raje oleh pacak "njilat" jadi kaki tangan Belande. Mengkeri anak cucung e banyak nyang njurai. Nyengkak dak pacak nyebut kenye wang e tapi kelek ke bae dai sifat e, gawe e muji-muji, takut nia kalu wang laen marak ke raje. Pokok e ole idak burit raja tu bae dijilat e.

Ade pulek wang tekojot oleh kene pemaleng,penodong dan segelek kejahatan idak meralang, ade masih isi umaku yang paling tekojot di PALI kak sampai ke musi situ name e "Koba" anak pak mas kemendan pelisi sekayu situ lagi pikul e. Wang jage ndak ndak nangkap e, senjate kereben e dikusut-kusut e. Aman uja wang koba pacak ngilang ade ilmu bayang itam, bayang poteh dan sekaligus bayang koneng.

Nah ade pulek nyang lihai pidato, banyak keria penggawo oleh cawa e idak ngagam ke ,gasah wang nga petet.

Cuma pesirah teluk kijing nyang pidato e melekat sampai mengkeri, ikak isi pidato e :

Wahai rakyatku, menga terime bae naseb kene memang la suratan, bese wang buyan makanan wang calak, wang calak makanan wang pintar, wang pintar makanan ta'un,, pajulah ta'un,,!! pajulah ta'un, paaajulah ta'un !! Sekian terime kaseh (pl)
Powered by Telkomsel BlackBerry®