"UMA ABU NAWAS"

Ilustrasi

Calak nia Abu Nawas kak, mbuat uma tampak penan rengkeh kate, pas dibelakang idak bedinding.

Konon kate Abu Nawas mbangun uma nyiwe tukang muare penimbung (aman pendek netak, aman panjang nyambung).

Bahan uma beramu di utan puguk la dek musyawarah nga sanak dulur.

Tetegak lako mbangun penan e dulu, pokok e la komplet tekak ke pintu lagi la tepasang kuro-kuro. Tapi kene keabisan bahan gara-gara memang la kurang nia kene dipintek raje, notok pulek tukang kak galak pulek bejual alahasil belakang e tebelangak idak bedinding, apelagi kate ndak bepintu.

Entah oleh ngape Raje ndak marah nia di Abu Nawas mbangun uma tu sebab e idak jelas, make mak Raje merentahke rakyat negeri Rukam condong nutus kenong nia keliling negeri merentahke ulubalang. Isi maklumat Raje : "Sape ndak birek, birek duma Abu Nawas" uja mak Raje. Alahasil beduyun-duyun lah wang birek diuma Abunawas. Sebab aman idak kene hukum oleh mak Raje.

Tabah hati ikhlas diri itulah yang pacak dilakuke Abu Nawas. Tapi bukan Abu Nawas aman idak pacak nuntut solusi e. Sekali waktu kelek ke nye putri anak gadis mak Raje ndak birek ke umanye. Iringke nye. Dem birek Abu Nawas manggil rakyat dan penasehat Raje. Abu Nawas ngadu bahwa Putri Raje idak cuma birek tapi kemek pulek tebukti sembakan nye birek basah gelek.

Singkat kate pengaduan Abu Nawas disidangke oleh Mahkamah Abu Nawas menang pekare. Keputusan Sidang :

1. Putri harus belaki Abu Nawas
2. Tai nyang la tekumpul dibersihke oleh mak Raje
3. Rakyat dak buli lagi birek diuma Abu Nawas.
4. Raje harus ngedek I abang ke buntut uma Abu Nawas...

Yak-yak u, tekiak bawa bau..aman bejalan ndak birek ngantongi batu, tai ngulang ke pangkal dagu...

(Disarikan dai "Andai-andai" rakyat PALI oleh : Alm.Pemuda Santri)